آگ کی لپیٹ میں آئے ہوٹل کی بالائی منزل سے کودتے لوگوں کےلیے اپنی دکان سے 2 لاکھ کے گدے پھینک کر انکی جان بچانے والے ریاض الدین۔۔۔

3 جون 2026 کی صبح تقریباً ساڑھے آٹھ بجے بھارتی دارالحکومت نئی دہلی کے علاقے مالویہ نگر میں واقع پانچ منزلہ ہوٹل میں اچانک آگ بھڑک اٹھی۔ چند ہی لمحوں میں دھواں اور شعلے عمارت کی بالائی منزلوں تک پھیل گئے۔ ہوٹل کا واحد داخلی راستہ آگ کی لپیٹ میں تھا، کھڑکیاں بند تھیں اور اندر پھنسے لوگوں کے پاس جان بچانے کے لیے بالائی منزلوں سے کودنے کے سوا کوئی راستہ نہیں بچا تھا۔

ہوٹل کے قریب ریاض الدین منصوری اپنے بیٹے ارمان منصوری کے ساتھ اپنی گدوں کی دکان پر موجود تھے۔ باپ بیٹے نے لوگوں کو کھڑکیوں سے مدد کے لیے پکارتے اور جان بچانے کے لیے نیچے کودتے دیکھا تو ایک لمحہ ضائع کیے بغیر اپنی دکان سے گدے نکالنا شروع کردیے۔

ریاض الدین اور ارمان نے پوری دکان خالی کرکے گدے ہوٹل کے نیچے سڑک پر پھیلا دیے، تاکہ بالائی منزلوں سے کودنے والے لوگ براہ راست پختہ سڑک پر گرنے کے بجائے ان پر گریں۔ وہ مسلسل گدوں کو درست جگہ پر رکھتے رہے اور اوپر پھنسے لوگوں کو انہی کی طرف کودنے کے لیے کہتے رہے۔

ریاض الدین کے مطابق ان کے بچھائے ہوئے گدوں پر کود کر 8 افراد کی جانیں بچ گئیں۔ اس وقت اسے یہ خیال نہیں آیا کہ دکان خالی ہونے سے کتنا مالی نقصان ہوگا، کیونکہ اس کے سامنے لوگ اپنی جانیں بچانے کے لیے کھڑکیوں سے کود رہے تھے۔ باپ بیٹے نے اپنے کاروبار کا سامان بچانے کے بجائے اسے اجنبی انسانوں کی زندگیاں بچانے کے لیے استعمال کردیا۔

آگ بجھائے جانے کے بعد بھی ریاض الدین اور ارمان وہاں سے نہیں گئے۔ انہوں نے اپنی دکان کی چادریں نکال کر امدادی کارکنوں کو دیں، تاکہ عمارت سے ملنے والے جاں بحق افراد کی لاشوں کو ڈھانپا جاسکے۔

اس خوفناک آگ میں مجموعی طور پر 21 افراد جان سے گئے، جبکہ 58 افراد کو عمارت سے نکال کر ہسپتالوں تک پہنچایا گیا۔ ریاض الدین اور ارمان کی دکان کے گدے عام دنوں میں ان کی روزی کا ذریعہ تھے، مگر اس دن وہ 8 انسانوں اور موت کے درمیان آخری حفاظتی دیوار بن گئے۔

Leave a Comment